الرجيم.....

السلام عليكم ورحمة الله وبركاته هالموضوع منقول بس وايد وايد عجبني والنصايح اللي فيه مفيدة حتى توقت اشتري الكتاب
بشوف اذا موموجود بمكتبة جرير بطلبه ان اء الله

دورت على كتاب كنت أبا أشتريه..و هالكتاب سوا ثوره كبيره في أمريكا( مؤلف الكتاب مدرب و رياضي أمريكي و يملك نادي رياضي )..هذا المدرب اتبع نهج مؤلف قبله...اللي عرف الناس على هالنضام اللي سوا ثوره...و أساسيات نظامه:أكل صحي+مشي+شد عضلات...واسم الكتاب: "بودي فور لايف" لمؤلفه بيل فيلبس....المدرب( صاحب الكتاب اللي نزله عقب هذا المؤلف و اسم الكتاب: "برن ذا فات آند فييد ذا مسلز"( الترجمة تعني: احرق الدهون و غذي العضلات) يقول إنه يشكر المؤلف بيل فيليبس على تعريفه هذا النظام الرائع للناس, و تعريفهم بمساوئ كل أنواع الريجيمات في العالم و أخطارها الصحيه...و يقول صارت له خبره 14 سنة و يحاول يوصل للوزن المثالي و العضلات المثاليه اللي يقدر يدخل فيه منافسات...و يقول كل أنواع الرجيمات جربها ما تم شي في السوق من أغذية و أدوية الهالغرض ما جربها...كل شي..و في النهايه يقول..عرفت إنه كل هالأشياء اتضحت لي إنها زباااااااااله(عزكم الله)....و الشي اللي فعلا فادني و جسمي وصل الى أعلى المستويات في الشكل و الوزن...هو المحافظه على الأكل الصحي+المشي+تمارين العضلات...واللي خبر الناس عنها بيل فيلبس في كتابه...بس عزاءه الوحيد في نظام بيل فيلبس إنه يشجع على استخدام بعض أنواع المقويات من ادويه وحبوب و غيرها اللي أبدددددددد ما ينصح فيها لأنه جرب معظهم و ما لقى منهم فايده...و يقول لو ما اتكونت عندي هاي الخبره من 14 سنه و أنا أجرب في كل شي قيل عنه أو اخترع ما كنت بكتب هالكتاب و كنت برشح كتاب بيل فيلبس اللي أثبت جدارته بالفعل و لكن باستثناء الأدوية و الحبوب اللي أوصابها....

حبيباتي...في هالكتاب...المدرب( اسمه توم فنوتو) في التشابترات الأوليه ركز على الأنسان و قوة إرادته و كيف يكون لما يفقد الثقه في النفس لما يكون جسمه خارج عن حدود اللياقه...و شرح كل انواع الرجيمات و فصل فيهم تفصيل...و كيف إنها تأثر و شرح هالشي بعد بالتفصيل...كل رجيم على حده و آثاره السلبيه...اللي بعض منهم يؤدون الى أمراض خطيره(و العياذ بالله)....و بعدين فصل في أنواع الأكل من دهون من كربوهيدرات و بروتين...و بين أهمية اجتماع ثلاثتهم للجسم في كل وجبه..و و ظيفة كل واحد فيهم مع الثاني في مد الجسم بالطاقه المناسبه مع حرق الزايد منها....
عقب حط المعادلات اللي يقدر كل واحد فينا يقيس معدل الدهون في الجسم اللي لازم يوصللها, الوزن المناسب اللي نبا نوصل له, وزن أو حجم العضلات, نسبة حرق الدهون اليومية اللي يقوم ابها الجسم, كمية السعرات الحراريه اللي لازم ياخذها الجسم في ثلاث حالات: إذا أبا أحافظ على وزني, أو أبا أنزل من وزني, أو أبا أزيد وزني....يعلمج كيف تحسبين هالأشياء على حسب الجسم اللي تبين توصلين له...هل تبين توصلين للمستوى الرياضي, أو المستوى الممتاز, أو المستوه الجيد, المستوى الوسط, و فيه طبعا المستوى السيئ و الأسوأ مب عشان توصلين له لكن عشان اتقارنين عمرج من خلال الحسابات وين موقعج أنتي امبين هايلا المستويات و وين نبيت اتكونين ..طبعا لازم اتكون المعطيات موجوده اللي هي نسبة الدهون الموجوده حاليا في الجسم و الوزن الحالي....و في التشابترات اللي عقب يشرح و يعلم وايد اشياء.. و يعلم كيف تحسبين المعلومات الغذائية إذا مب حاطين السعرات على العبوات....يقول لا اتقولون معقده...مره وحده بس تتعلمون كيف تحسبون و المعادلات جدامكم و تتعلمون كيف تحسبون حق عماركم السعرات اليوميه....بسسس...عقبها بتعرفون رواحكم اتحددون الأكل اللي تاكلونه بدون ما تحرمون عماركم من اكلات معينه...و طبعا يخبرج بأهمية الدهون في إمداد الطاقه و حرق الزايد منها و تحريرها من إتهامات الناس و الإعلام الإتهام المطلق...فيه دهون مفيده و فيه دهون سيئه و فصل فيهم بعد....يعني الصراااااااحه معلومات قييييييمه و في أشياء أول مره أعرفها و كانت بالفعل صحيحه, و طبعا الحسابات كانت جدا دقيقه....صح تاخذينلج كمن يوم وانتي تقرين..بس فعلا استفدت امنه...طبعا في النهايه حاطلج نموذج صغير بالمعلومات الغذائية عن معظم الأطعمه اللي نتناولها يوميا( بس أنا ما كفاني,,دخلت موقع عطاني كل الأطعمه في العالم )....

طبعا أنا كنت بادية أخفف من قبل فكملت مع إتباعي لإرشادات المدرب..و استفدت من وايد اشياء أهمها:
في شي في الجسم يسمونه الميتابولزم...هذا مسؤول عن حرق الدهون اللي تتكون من الطاقه اللي في الجسم...عشان الميتابولزم يشتغل مظبوط ...يقول المدرب أككككبر غلط تفويت اي وجبه من الوجبات لأنه هذا الشي يعيق عمل الميتابولزم.لأنه الدماغ يعطي إشارات إنه ما في أكل فلا تحرق شي! فيتوقف الميتابولزم عن الحرق..و بالعكس ينصح بأنه بعد ما تحسبون السعرات الحراريه اللي لازم تاخذونها في اليوم مثلا عشان ينقص الوزن...ينصح بإنه السعرات لازم تتقسم إلى وجبات على اليوم كامل ويا حبذا اتكون الوجبه الأخيرة أقل من اللي قبل..وتتوزع على 5 وجبات بالنسبه للنساء و 6 بالنسبه للرجال..هذا الشي ييسرع من عمل الميتابولزم في الحرق فيحرق 5 بدال ما يحرق 3 وجبات فيساعد أكثر في عملية إنقاص الوزن...

عملية التجويع جددددددا مرفوضه لأنه مثل ما قال تبطأ عمل الميتبولزم و على الوقت يكون الها رد فعل عكسي من جراء الحرمان..في الجسم على المدى القصير...و في إنقاص الوزن على المدى البعيد..

الرياضه جدا مهمه...و ممكن الواحد يبتدي بالمشي إذا ما يستخدم جهاز المشي..يبتدي من نص ساعه و عقب يزيد الفتره على الوقت من 45 دقيقة إلى ساعه.. و ها الشيء جدا مفيد للعضلات + حرق الدهون...

يقول لا تفرحين إذا شفتي وزنج ينقص إذا اعتمدت على رجيم معين أو يوعتي عمرج أو أتبعتي أي نظام بدون رياضه او مشي...لأنه هالنقصان ممكن يكون من نقص الماء في الجسم أو ضعف في عضلات الجسم...فبالتالي ما استفدنا شي و ما حرقنا كمية الدهون الزايده المختزنه في الجسم....بس تعبنا أجسامنا على الفاضي و اول ما نترك اللي كنا نسويه رد الوزن مثل ما كان!

المعدل الأسبوعي الصحي لنقصان الوزن يقول باوندين( يعني تقريبا كيلو), إذا نقص الأنسان أكثر من جه يقول اتيقنوا إنه الزياده عن الكيلو راحت من العضلات أو من الماء في الجسم...فيقول لا يفقد كنتروله الواحد و يتحمس زياده عن اللزوم و ينقص أكثر من المطلوب اسبوعيا..لأنه هذا بيضر صحته في النهايه و ما بتوصل قوة عضلاته الى المستوى المطلوب بالنسبة لكل فئة من الجنسين و أعمارهم و أوزانهم..

وشي ثاني بعد يقوله في الكتاب إنج بإمكانج إنج اتغشين و جبه ولا وجبتين في الأسبوع..بس مب الويكند كله! و يقول إنه في طريقة بعد ممكن تتبعينها إذا وصلتي لمرحلة إنج ماشية مظبوط بس ما تنقصين في الوزن..وهي إنج مثلا إذا كانت السعرات اليوميه المخصصه لج هي 2400 ممكن اتزيدين بحيث يكون مجموع اللي خذتيه يساوي 2800 و اتسوين هالشي لمدة يوم أو يومين أو حتى ثلاثة ايام بس رابع يوم ترجعين طبيعي..بهالطريقه تخدعين جسمج و اتخلين الميتابولزم يحرق عقب ما ترجعين لل1200 أكثر مما كان يحرقه قبل ما اتسوين هاي الحركه..و اللي يسمونها طريقة الزيجزاج..و اتعيدينها عقب فتره..يقول هاي الطريقه وايد يسوونها اللي عندهم مسابقات أو منافسه معينه عندهم في امريكا( و يقول هاي من بعض أسرار الرياضيين اللي ما يخبرون عنها حد!)

الكتاب باختصار.....رووووووعه ويستحق القرايه و التطبيق...لأنه أنا كملت اللي كنت بادتنه مع إرشادات المدرب...حسبت كل المطلوب و اخترت مستوى معين امشي عله عشان أوصلله من بديت اخفف وكملت مع إرشادات الكتاب.و بديت أمشي... و قست كمية الدهون في جسمي... خلال 19 يوم الدهون كانت في جسمي عقب ما بديت أقيس على الميزان(كنت امكمله أسبوع من بديت فماعرف كم كانت الدهون أول يوم) كنت 2601% و الحين 2505 و يوم قست وزني على نفس الميزان هذاك اليوم عطاني 5505 و كنت ناقصه أساسا تقريبا كيلو(يعني بحساب هالميزان يكون وزني من البدايه 57 تقريبا) و اليوم قست و عطاني 5406... يعني نقصت 2.3 كيلو.... أنا عندي ميزان يقيس الوزن و الهون بس المدرب يقول ممكن نستخدم هاي الأجهزه لكن اللي شافه أدق في قياس مستوى الدهون في الجسم هو عباره عن جهاز صغير يستخدم بطريقه بحيث إنه يلقط اليلد الى مستوى معين (في كذا مكان من الجسم ممكن استخدام الجهاز فيه) و يقيس, يقول لأنه الدهون مختزنة تحت طبقة الجلد فيكون القياس أدق بهالطريقه....ما مدح شركه معينه بس قال فيه عدة شركات اتصنع هذا الجهاز و رخيص مب غالي فقال ممكن تشترون اللي يريحكم من الشركات..يسمونهم كاليبرس(skinfold callipers) ...طلبت أنا واحد من الإنترنت من شركه من شركات بيع الأجهزه الصحيه و الرياضيه واحد يسمونه(accu-measure skinfold calliper) و أترياه يوصلنب بالبريد, بس الحين أستخدم الميزان اللي حاليا عندي يقيس الوزن و الدهون و الماي في الجسم من شركة أوسيم المعروفه( أكثر شي اشتهرت به في مجال كراسي المساج الممتازه و الفعاله و مب أي كلام) و عندهم بعد اجهزه مساج للرجل و غيرها من الأجهزة الصحيه..

منقوووووووول

الموضوع الأصلي : الرجيم..... المصدر : منتدى الجمال الباكى الكاتب: افراح